கண்ணீரில்  விழுந்த  இதயம்!

.

நெஞ்சு நிறைய

கண்ணீரைக் கொட்டிவிட்டுச்

சென்றுவிட்டாய்!

மூச்சுவிட முடியாமல்

மூழ்கிக் கிடக்கிறது  இதயம்.

நீரில் விழும் எல்லாமும்

எடை இழக்கும் என்பார்கள்

உன் கண்ணீரில் விழுந்த

என் இதயம் மட்டுமே

கனமாய்க் கனக்கிறது!

==============================================

நீயே என் காதலி!

உன்

உள்ளத்தைத் தொடவரும்

ஒவ்வொரு  முறையுமே

உன்

பாதங்களைத்  தொடமுடியாத

பாவப்பட்ட அலைகளாய்

நான் திருப்பி  அனுப்பப்படுகிறேன்

எனினும்

என் காதலை  நிராகரிக்கும்

நீயே என் காதலி!

=============================================

- கவிஞர்  புகாரி, கனடா

('காதலிக்கிறேன் உன்னை எப்போதும்...' தொகுப்பில்)